شروط إسقاط حضانة الأطفال عن الأم

متى تفقد الأم حقها في حضانة اطفالها ؟
بقلم: علي معوض المحامي
حضانة الأطفال الموضوع ده من أكتر الحاجات اللي بتشغل بال الناس في المحاكم.
القانون وضع قواعد واضحة عشان يضمن مصلحة الطفل أولاً، وحدد حالات معينة لو حصلت، الأم بتفقد و بتيسقط حقها في الحضانة وبتتنقل لحد تاني اللي يليها في الترتيب
الحالات اللي بتسقط فيها الحضانة عن الأم:
حسب القانون فيه شوية شروط لو اختلت، الحضانة بتتشال وبتسقط عن الأم، وأهمها:
١)الإهمال وعدم الأمانة: زي إنها تسيب الطفل لوحده لفترات طويلة وتخرج كتير، وده بيثبت إنها مش قد مسئولية التربية.
٢)زواج الأم: لو الأم اتجوزت، الحضانة بتتنقل بالترتيب لـ (الجدة للأم، ثم الجدة للأب، ثم خالة الطفل، ثم عمته).
٣)المرض الشديد: لو الأم عندها مرض يمنعها جسدياً إنها تهتم بالطفل وترعاه.
٤)السلوك والأخلاق: لو الأم بتمارس مهن مخالفة للقانون أو الدين، أو صدر ضدها حكم في جريمة بتمس الشرف والأخلاق
٥).الإدمان: لو ثبت إن الأم بتتعاطى مخدرات أو كحوليات.
٦)عند كسر حكم الرؤية: لو الأم منعت الأب إنه يشوف ولاده ورفضت تنفذ حكم الرؤية من غير عذر، الأب من حقه يطلب إسقاط الحضانة عنها مؤقتاً.
٧)الأهلية العقلية: لو الأم بتعاني من مشاكل عقلية أو مش بكامل قواها اللي تسمح لها بتمييز الأمور.
٨)السفر بالولاد: لو الأم سافرت بالولاد لمكان يمنع الأب من ممارسة حقه في إنه يشوفهم.
طيب لو الحضانة راحت للأب.. إيه الشروط؟
الأب عشان ياخد الحضانة لازم:
يكون عنده (ست) من قرايبه تقدر تساعده في رعاية الولاد.
لو المحضون “بنت”، لازم الأب يكون “مَحرم” ليها.
لازم يكون من نفس دين الطفل.
امتى بتخلص سن الحضانة؟
الحضانة بتنتهي رسمياً لما الطفل يوصل ١٥ سنة. في السن ده، الأب من حقه يطلب من المحكمة إنها “تخيّر” الأولاد: حابين يكملوا مع مامتهم ولا ينقلوا يعيشوا مع باباهم؟
الهدف من كل القوانين دي مش “عقاب” طرف على حساب التاني، لكن الهدف الأساسي هو إن الطفل يتربى في بيئة هادية ومستقرة ومناسبة ليه.