مقالتنا انهاردة عن موضوع
الاضطراب الوجدانى ثنائى القطب
Bipolar Disorder
وعشان نعرف معلومات اكتر عنه قابلنا
د.محمد سعد في عيادة توازن للصحة النفسية وسألناه
السؤال الاول ممكن حضرتك تكلمنا عن الاضطراب الوجدانى ثنائى القطب؟
الاضطراب الوجدانى ثنائى القطب اومايعرف بالبيبولار هوعبارة عن اضطراب بيتكون من نوعين من النوبات
نوبات الاكتئاب وما يعرف ب نوبات الهوس
هبدأ بسمات نوبات الاكتئاب
صفات كتير بتميز النوبات دى وبتختلف شدتها طبعا لكن اغلبها بتتأثر فيها الجوانب دى في المريض
بيكون مزاجه سئ اغلب اليوم تقريبا كل يوم واحيانا بيبكى
بيكون فيه عزلة وابتعاد عن الناس
بيكون حاسس ان جسمه مكسر وطاقته قليلة ومش قادر يعمل اى حاجة
ومش عايز يعمل اى حاجة
وفاقد الشغف بمعنى ان الحاجات اللى كانت بتبسطه زمان مبقتش بتبسطه
كمان النوم بيتأثر وبيبدأ يبقى عنده ارق سواء ان نومه يكون متقطع وبيصحى كل شوية او يتأخر في الوقت لغاية مايدخل في النوم او يلاقى نفسه نام كام ساعة وصحى الفجر لوحده ومش عارف ينام تانى
والشهية للأكل كمان بتتأثر فبتزيد أو تقل وكذلك الوزن يزيد او يقل
بيكون فيه أحيانا إحساس بالذنب وضعف الثقة في النفس
وفى المراحل المتقدمة الشخص بيبدأ يتمنى الموت او يدعى على نفسه
ولو تم اهمال المرض فممكن يبدأ يبقى عنده أفكار ورغبة في الانتحار وممكن يبدأ يخطط ل دا او ممكن يبدأ يخطط ل دا او بالفعللل يكون فيه محاولة للانتحار
نوبات الهوس
بتبدأ ان نوم المريض يقل وممكن ينام ساعة في اليوم اواليوم او حتى مينامش لفترات طويلة بالأيام
ومع ذلك بتكون طاقته عالية وعايز يعمل حاجات كتير
وكمان بتكون حركته كتير وكلامه كتير وبينط من موضوع لموضوع بشكل غير مترابط
وحالته المزاجية مبتكونش مستقرة فأحيانا يكون مبسوط واحيانا يتعصب من اقل حاجة
والمريض بيفتقد الحدود الاجتماعية فيبدأ مثلا يسلم على ناس ميعرفهاش في الشارع
و ممكن دا يتطور لإنه يتحرش ب حد او يقلع هدومه في الشارع مثلا
وبيكون عنده سوء حكم على الأمور
وبينفق فلوس كتير على حاجات ملهاش ضرورة
طبعا السمات دى محتاجة متخصص لتحديد درجتها ولعمل التشخيص اللازم
ولو الشخص متعالجش بيبدأ يدخل في مضاعفات اسمها اعراض الفصام الذهانى
بيبدأ يستقبل بحواسه حاجات مش موجودة
زى انه يسمع صوت صفارة او وش في ودنه او حتى يسمع صوت حد بيكلمه
او يشوف خيالات زى ظل او ضوء بعينه او حتى يشوف اشخاص بتكلمه ومتكونش موجودة في الحقيقة
وبيبدأ يبقى عنده ضلالات
وهى أفكار و معتقدات خاطئة
زى انه يفتكر ان الناس بتتكلم عليه او حد ماشى وراه اوبيراقبه او الناس بتشاور عليه
طبعا للأسف اعراض الفصام الذهانى بتحصل أحيانا مع بعض الامراض النفسية الأخرى لما متتعالجش زى الاكتئاب او الوسواس القهرى الشديد او مع تعاطى المخدرات
ودى احد مخاطر تعاطى المخدرات
ان ممكن تتسبب في ان شخص يجيله نوبة هوس او اكتئاب او فصام ذهانى
المرضين دول بالذات محتاجين وعى الأشخاص المحيطة بالمريض لأنهم هم اللى هيلاحظوا التغير عليه ولازم وقتها يستعينوا بالمتخصصين والعلاج بيكون بشكل رئيسى دوائى
وطبعا فيه استخدام لمدارس العلاج النفسى بالذات المعرفى السلوكى في الاكتئاب بالذات
وبنصح كل واحد اتشخص بالمرض دا انه يستعين بالمتخصصين في دا وبربنا طبعا اولا واخيرا
وأخيرا تقدروا تنورونا في عيادتنا وأي حد عنده ظروف مادية فمش هتمنع ابدا من علاجه واحنا هنحاول علي قد مانقدر كفريق عيادة اطباء واخصائيين نساعده
وبنقدم جلساتنا في العيادة اونلاين كمان عشان لو الشخص بعيد عننا
ودا عنوان عيادة توازن للصحة النفسية
القاهرة،مصر الجديدة
عمارة ٦ شارع عبد الله نور (ناصية بنك QNB)المتفرع من الميرغني (خلف زلط ولطفي) الدور الارضي المدخل الخاص شقة رقم ١ مكرر ، بجوار نادي هليوبوليس
عند تقاطع الخليفة المأمون مع شارع الميرغني
اقرب محطة مترو هي مترو كلية البنات
وللتواصل مع العيادة
01050888774
حسابات العياده علي مواقع التواصل
فيس بوك
https://www.facebook.com/BalanceMentalHealthAcademyAndClinic
يوتيوب
https://www.youtube.com/@Balance.mental
انستجرام
https://www.instagram.com/balance_mental.health
تيك توك
